Debegesak lankidetza hitzarmena berritu du Gipuzkoako Foru Aldundiarekin, lurraldeko garapen eredu bateratua sendotzeko konpromisoa berretsiz
Gaur goizean sinatu da Gipuzkoako Foru Aldundiaren egoitzan Debegesa eta beste hamar garapen agentzia eskualdekoen arteko lankidetza hitzarmen berritua. Akordio honen helburua da lurraldeko gobernantza kolaboratiboaren eredua indartzea, eta garapen ekonomikoa, enplegua, berrikuntza eta gizarteratzea sustatzen jarraitzea.
Ekitaldian Eider Mendoza, Ekonomia Sustapeneko eta Proiektu Estrategikoetako diputatuak parte hartu du, bai eta eskualdeetako agentzien ordezkariek ere, tartean Debegesak, Debabarrenaren izenean.
Hitzarmen hau “Etorkizuna Eraikiz” estrategiaren baitan kokatzen da, eta azken urteetako lankidetza estua egonkortzea du helburu, konfiantzan, erantzukizun partekatuan eta lurraldearen ezagutzan oinarrituta.
Lankidetza eredu eraginkorra eta hurbilekoa
Akordio honi esker, Debegesak Gipuzkoako Foru Aldundiarekin elkarlanean jarraituko du, eskualdeko benetako beharretara egokitutako politika publikoak diseinatzen eta gauzatzen. Hona hemen lehentasunezko helburuak:
- Tokiko ehun produktiboaren lehiakortasuna sustatzea.
- Ekintzailetza, eraldaketa digitala eta iraunkortasuna bultzatzea.
- Enplegagarritasuna eta gizarteratzea errazten duten programak garatzea.
Debegesa, eskualdeko garapenean erreferente
Debegesak lan egiten du Debabarreneko garapen ekonomikoaren alde, erakundeen, enpresen, herritarren eta gizarte-eragileen arteko lotura lana eginez. Hitzarmen berri honek Debegesaren eginkizuna indartzen du, lurraldearen dinamizazioan eta gobernantza partekatu eraginkor batean funtsezko eragile gisa.
Ekitaldian, Eider Mendoza diputatuak honakoa adierazi du: Garapen agentziak zarete gobernantza partekatu eta eraginkor baten benetako sarea. Lankidetza honek aukera ematen digu Gipuzkoak aurre egin behar dien erronka ekonomikoei, sozialei eta teknologikoei hobeto heltzeko.”
Debegesatik oso positiboki baloratzen dugu akordio honen berritzea, lurraldeko gainerako eskualdeekin lerrokaturik jarraitzeko aukera ematen diguna, lankidetzan, hurbiltasunean eta ekintza bateratuan oinarritutako garapen eredu baten alde lanean jarraitzeko.