Debegesak Debabarrenean trantsizio energetikoarekin duen konpromisoa indartu du Gipuzkoako Foru Aldundiarekin sinatutako hitzarmen berri baten bidez
Debegesak, Debabarreneko garapen agentziak, lankidetza hitzarmen berri bat sinatu du Gipuzkoako Foru Aldundiarekin, lurraldeko eskualdeko gainontzeko garapen agentziekin batera, energia eredu justuago, jasangarriago eta herritarrengandik hurbilago baterantz trantsizioa bultzatzen jarraitzeko.
Akordio horri esker, Aldundiko Iraunkortasun Sailak guztira 600.000 euro bideratuko ditu Gipuzkoako hamar eskualde-agentzietara, eta horietatik 60.000 euro Debabarrenean inbertituko dira. Maialen Gurrutxaga Elgoibarko alkate eta Debegesako presidentearen hitzetan “ekarpen honek 2019an onartutako Debabarreneko Energia Estrategia bultzatzen jarraitzeko aukera emango digu eta horretan jarriko dugu fokua. Urteko Jarduera Plan honetan, orain arte egin ohi dugun lanarekin jarraitzea proposatzen da, duela urte batzuetatik hona jarraipena emanez”.
Hain zuzen ere, Debabarrenean kontsulta energetikoak egiteko zerbitzua jarriko da abian, herritarrei, enpresei eta tokiko administrazioei zuzenduta. Gainera, energia-diagnostikoak egingo dira industria-enpresetan, eredu iraunkorragoak eta eraginkorragoak lortzeko trantsizioan laguntzeko.
Debegesak oso positibotzat jotzen du eskualde-bultzada hori, agentziek lurraldeari egokitutako energia-politikak planifikatzeko eta gauzatzeko funtsezko eragile gisa duten zeregina indartzen baitu. Maialen Gurrutxaga Debegesako presidente eta Elgoibarko alkateak nabarmendu duenez, “trantsizio energetikoak justua eta gertukoa izan behar du, eta horretarako funtsezkoa da administrazioek elkarrekin lan egitea, arlo publikoaren eta pribatuaren artean bezala Hitzarmen honek Debabarrenetik norabide horretan aurrera egiten jarraitzeko aukera ematen digu”.
Baterako lan-ildoek indartu egiten dute agentziek eskualde bakoitzean energia-erreferente gisa duten zeregina, eta, horretarako, udalekin elkarrizketa teknikoa izatea, eskualdeko energia-mahaiak dinamizatzea eta Gipuzkoako Energia Iraunkorraren Lurralde Mahaian modu aktiboan integratzea sustatzen dute. Tokiko gobernantzaren eskema horrek ekintza koordinatua errazten du, lurraldearen ezagutzan eta pertsonekiko gertutasunean oinarritua, eta pobrezia energetikoa, autokontsumo berriztagarria edo eraikin publikoen efizientzia bezalako erronkei modu partekatuan ekiteko aukera ematen du.
Debabarrenaz gain, Oarsoaldea, Tolosaldea, Urola Erdia, Goierri, Urola Garaia, Debagoiena, Beterri-Buruntza, Bidasoa eta Urola Kosta eskualdeetara ere iritsiko dira emanaldiak, lurraldeko 89 udalerrietatik 88 hartuz.
Horrela, Debegesak lanean jarraitzen du trantsizio energetikoa Debabarreneko txoko guztietara hurbiltzeko, lurraldearen ezagutza eta tokiko beharretara egokitutako irtenbideak uztartzen dituzten ekimenekin.