89 lan-kontratu lortu dira Debegesak kudeatutako Elkar-EKIN Lanean 2022-2024 lan-munduratze programari esker
Egoera ahulean dauden 89 pertsonak lan-kontratu bat lortu dute Debabarrenean, Gipuzkoako Foru Aldundiak bultzatutako Elkar-EKIN Lanean 2022-2024 programari esker. Formalizatutako kontratuez gain, Elkar-EKIN Lanean ekimenak 13 ibilbide profesional jarri ditu martxan 5 jarduera-sektoretan, besteak beste, zaintza, ostalaritza, eraikuntza, zerbitzu eta industria sektoreetan. Debegesak 2019tik darama enplegu inklusiboa eta kalitatezkoa sortzeko funtsezko tresna gisa sendotzen ari den programa sustatzen.
2025-2026 urteetarako programazioa duen laugarren edizio honetan, Debabarreneko 87 pertsona ari dira parte hartzen, besteak beste, ibilbide hauetan: Ostalaritza eta Turismoa, Instalazioa eta mantentze-lanak, Eraikuntza eta obra zibila, Fabrikazio mekanikoa, Zerbitzu soziokulturalak eta komunitateari zuzendutakoak, Merkataritza eta Marketina eta Zerbitzu soziokulturalak. Debegesa programa kudeatzeaz arduratzen da eta ibilbideak Edukeibar, Daiteke, IMH Campus, Zabaltzen Sartu eta Armeria Eskola Elkarteak eskaintzen dituzte.
Elkar-EKIN Lanean elkarlaneko gobernantzan oinarritutako ekimena da, Gipuzkoan eta eskualdeetan enpleguaren ekosistema indartzeko sortua. Politika partekatuen eta erakunde publikoen, eragile sozialen, ekonomikoen eta hezkuntza-esparruko eragileen arteko lankidetzaren logikaren bidez, programak lan-merkatuaren erronkei erantzun koordinatuak eta iraunkorrak ematea bultzatu nahi du, hainbat ikuspegi eta baliabide integratuz, eta lurraldeko benetako beharrei erantzungo dieten erantzukidetasuna eta ko-sorkuntza sustatuz.
Elena Alonsok, Enplegu eta Gizarte Berrikuntzako arduradunak, azpimarratu duenez, “ez dago garapen ekonomikorik gizarte-kohesiorik gabe. Elkar-EKIN Lanean ekimenak erakusten du posible dela kalitatezko enplegua sortzea, modu erabakigarrian laguntzea inklusioa bermatzen, benetako lan aukerak sortuz”. Gipuzkoako Foru Aldundiak (%85) eta Gipuzkoan kokatutako Debabarreneko Udalek finantzatutako proiektua da.