Tripontziak ekimen gastronomikoaren hamairugarren edizioa ospatuko da Debabarrenean
- Azaroaren 6tik 29ra egingo da Debabarreneko Klub Gastronomikoko kide diren eskualdeko zortzi jatetxetan; bertako produktuekin egindako menu bereziak eskainiko dituzte 39 eurotan.
- Garaian garaiko eta bertako produktuen kontsumoa sustatzea eta Debabarreneko establezimenduak zein ekoizleak ezagutzera ematea dira ekimen honen helburuak.
Eibar / 2026.10.21.- Azaroaren 6tik 29ra, Debabarrena eskualdeak Tripontziak ekimen gastronomikoaren hamairugarren edizioa ospatuko du, Debegesa Garapen Agentziak eta Debabarreneko Klub Gastronomikoak antolatuta. Aurten ere, Eusko Jaurlaritza-turismo eta Gipuzkoako Foru Aldundiko turismo departamentuaren babesa du ekimenak. Hasi zenetik, ekimenaren helburua izan da bertako eta garaian garaiko produktuen kontsumoa sustatzea eta Debabarreneko sukaldari, establezimendu gastronomikoak zein bertako produktuak balioan jartzea.
Edizio honetan, Eibarko Baratze Taberna eta Bulebú, Elgoibarko Belaustegi eta Txarriduna, Mallabiko Trabakua Behekoa eta Debako Hiru Bistro, Itsaslabarrak eta Urgain jatetxeek hartuko dute parte, eta sasoiko eta tokiko produktuetan oinarritutako platerak eskainiko dituzte, jatetxe bakoitzak bereak. Menuak, 39 eurokoak dira eta barne hartzen ditu aperitibo bat, sarrera, bi plater nagusi (haragia eta arraina) eta Mendaroko txokolatearekin egindako postrea. Ogia, kafea eta ardoa ere menuan sartzen dira, eta jatetxe guztiek ardo berdina eskainiko dute menuekin: Familia Valdelana upeltegiko ardo zuria eta ardo beltza. Bestalde, 6 euroko gehigarri baten truke, txakolinaz gozatu ahal izango da.
Jatetxe bakoitzak eskainiko duen menua kontsultatzeko debabarrenaturismo.com webgunean sartu behar da hemen. Beharrezkoa da aurrez jatetxera deitu eta erreserba egitea Tripontziak Menua dastatu nahi dela aipatuz.
Tripontziak zozketa
Aurreko urteetan bezala, aurten ere ekimenean zehar, zozketa bat egingo da. Parte hartzeko jatetxeetan eskuragarri egongo diren kupoiak edota QRa bete behar dira eta bertan eskatzen diren datuak osatu. Parte-hartzaile guztien artetik, bi irabazle aterako dira, eta bertako produktuekin osatutako otar bana jasoko dute.
Planak Tripontziak ekimenak irauten duen bitartean
Tripontziak ekimenak aukera paregabea eskaintzen du eskualdeko ondare industrial, natural eta geologikoa ezagutzeko.
Debabarreneko historia kontatzen duten museoak
Elgoibarren, Makina Erremintaren Museoak fabrikazio mekanikoko prozesuetan erabiltzen diren teknologien jatorria eta bilakaera erakusten duen gida didaktiko oso bat eskaintzen dute. Azaroaren 2tik abenduaren 18ra bitarte, Sigma Bebé eta bere lagun txikiak erakusketa ikusi daiteke, 1959an, SIGMA-k sortutako eta merkaturatutako josteko makina txiki bat, Bebé modeloa.
Bestetik, Eibarren, Armagintzaren Museoak hiriaren iragan industriala aztertzen du, Armagintza Eskolaren Museo zaharretik ekarritako armen bildumatik hasi eta denboran zehar Eibarren fabrikatutako produktuen erakusketa zabaleraino. 2026ko urriaren 8tik 2027ko urtarrilaren 10era aldi baterako erakusketa dago ikusgai, Eibarko GAC enpresaren bizikleta bilduma, bizikleten fabrikazioaren hasieraren mendeurrena ospatuz.
Natura, geologia eta ondarea: ingurunea esploratzeko ibilbideak
Natura, geologia eta ondarea uztartzen dituen ibilaldi interpretatuak egiteko aukera ere izango dute bisitariek. Proposamen aipagarri bat Elgoibar, Soraluze eta Bergara lotzen dituen Dolmenen Ibilbidea da, itsasoa eta mendia lotzen ditu eta 19 trikuharri eta elementu megalitiko ezagutzeko aukera ematen du. Azaroaren 22an bisita gidatua egiteko aukera dago, euskaraz.
Deban, HAB – Historiaurreko Bailara espazioak aire zabaleko museo gisa funtzionatzen du, eta bertan posible da bailaran aurkitutako aztarna arkeologikoak ezagutzea eta klima aldaketak tokiko geografian utzi dituen aztarnak behatzea. Mutrikun, Olatz, Haran ezkutuak izenez ezagutzen den ingurune geologiko berezian barneratzeko aukera ematen du, kare-harriaren higadurak itxitako haranean.
Azkenik, Flyscharen Ibilbideak benetako bidaia eskaintzen du Lurraren milioika urteko historian zehar. Ibilbide honek Paisaia Natural Babestu izendatutako kostalde bat zeharkatzen du, Euskal Kostaldeko Geoparkearen zati bat, planetaren bilakaera geologikoa kontatzen duten itsaslabar ikusgarriekin.
Tripontziak ekimenak kultura, historia eta natura uztartzen dituen esperientzia oso bat proposatzen du, bertakoak eta bisitariak gonbidatuz Debabarreneko altxorrak ikuspuntu berrietatik berraurkitzera.
