Hezkuntza-zentroek, Elgoibarko Udalak eta Debegesak Bigarren Eskuko Azoka bat antolatu dute Eskola  Agenda 2030 programaren baitan

Udaleko Ingurumen Arloak, Debegesaren, Herri Eskolaren, Ikastolaren eta IES Elgoibar BHIren lankidetzarekin,  martxoaren 12an Bigarren Eskuko Azoka ospatuko du, Eskola Agenda 2030 programaren  barruan. Ekimenaren helburua da ikasleen eta familien artean kontsumo arduratsua,  berrerabilpena eta ekonomia zirkularra bezalako balioak sustatzea. 

Azoka Aita Agirre plazan egingo da, 9:00etatik 13:00etara, eta bertan ikasleek zein irakasleek  parte hartuko dute aktiboki. Bertaratzen direnek bigarren eskuko artikuluak erosi ahal izango  dituzte —liburuak, jostailuak, arropa eta bestelako objektuak—, egoera onean daudenak eta  bigarren bizitza bat izateko prest daudenak. 

Jardunaldi hau ikastetxeetan aurrez egindako lanaren emaitza da; izan ere, ikasleek Agenda  2030aren baitan hondakinen kudeaketaren inguruan, kontsumo-ereduei buruz eta ohitura  jasangarriagoak hartzearen garrantziaz hausnartu dute. Azken asteetan, zentroek Garapen  Jasangarrirako Helburuekin lotutako edukiak landu dituzte, ikasleen begirada kritikoa  zabaltzeko eta ekintza honetarako prestatzeko. 

Ekimenak udalerriko konpromisoa azpimarratzen du Garapen Jasangarrirako Helburuekin  (GJH), eta komunitate hezitzailea sentsibilizatu nahi du hondakinak murriztearen eta  produktuen bizitza baliagarria luzatzearen beharraren inguruan. Era berean, parte-hartzea,  balioetan oinarritutako hezkuntza eta familien inplikazioa bultzatzen ditu ingurumenaren  aldeko egintza zehatzetan. 

Ekitaldiak izaera solidarioa ere izango du: bildutako dirua Nuala elkarteari bideratuko zaio, eta  saldu gabeko artikuluak Gurutze Gorriari eta Karitasi entregatuko zaizkie. 

Herritar guztiak animatzen ditugu jardunaldi jasangarri honetan parte hartzera, ingurumen hezkuntza, elkarbizitza eta elkartasuna uztartzen dituen ekimena baita. 

Eskola Agenda 2030 Debabarrenean 

Debegesa, Debabarreneko garapen-agentziak, hogei urte daramatza eskualdeko udalekin  elkarlanean Eskola Agenda 2030 proiektua bultzatu eta koordinatzeko. Jasangarritasunerako  hezkuntza-programa honek hezkuntza-komunitate osoari zuzentzen zaio, eta hiru helburu  nagusi ditu: 

• Ikastetxeak ingurumen- eta gizarte-praktika onen erreferente bihurtzea.
• Ikasleei ingurumen- eta gizarte-arazoak identifikatu eta horiei aurre egiteko gaitasuna  ematea. 
• Parte-hartzailea eta ingurunea errespetatzen duen hezkuntza bermatzea. 

Ingurumen Arlotik eta hezkuntza-zentroetatik, herritar guztiak gonbidatzen ditugu azokara  gerturatu eta ekimen kolektibo honetan parte hartzera. Zuen parte-hartzearen bidez,  ikasgeletan egindako ikaskuntza indartu eta gure komunitatea jasangarriagoa, solidarioagoa eta  kontzienteagoa eraikitzen jarraitu ahal izango dugu.