Antonio Cancelo, Eroskiren fundatzailea eta MCC Taldeko presidente ohia, GURE BALIOAK Saria 2015

2015-10-16 Iruzkinik ez

Antonio Cancelo, eibartarra adopzioz, Eroskiren fundatzailea eta Mondragon Taldeko presidente ohiarentzat  izango da Gure Balioak Saria 2015.

Antonio Cancelo Gure Balioak Saria jasoko duen seigarren persona izango da, 2010. urtean eratu zenetik Debegesa garapen agentziaren ekimenez. Sariak Debabarrenean gizarte balioen sustapenean nabarmendu den pertsona aitortzea du helburu. Debabarreneko bereizgarri eta azpimarragarri diren balioak eta Gure Balioak egitasmoak sustatu nahi dituenak dira ekintzailetza, lankidetza, errespetua eta integritatea.

Epaimahaiak, enpresa, hekuntza, kultura eta arlo sozialean diharduten Debabarrena eskualdeko 9 lagunek osatua, Canceloren “lan ibilbide zabal eta bikaina” nabarmendu du, “sustrai sakonak dituzten balioen erakusgarri, horien artean bere gaitasun ekintzailea, pertsonengan jarritako konfiantza eta gizarte solidario eta bidezko baten aldeko konpromisoa” nabarmenduz.

Epaimahaiak aintzat hartu du “Canceloren ekarpen baliotsua garapen ekonomiko eta sozialaren alde, enplegua sortuz eta ingurunearen hobekuntza eta guztien ongizatea bilatuz”.  Baina, batez ere, “beste enpresa eredu baten adierazgarri izan izana” aitortu dio epaimahaiak Cancelori, “mozkinak, merkatua, eraginkortasuna eta antolamendu egokia ez daudela  lehian elkartasunarekin eta ardurak partekatzearekin, eta lankidetza, zintzotasuna, apaltasuna, esfortzua eta nekaezintasuna ez daudela lehian errentagarritasun ekonomikoarekin eta, batez ere, sozialarekin”.  

Epaimahaiak Canceloren lan ibilbide “sendoa eta koherentea” hartu du kontuan. 1969an, euskal enpresa handienetako baten sorreran parte hartu zuen, Eroski. Bertako zuzendari izan zen 1990. urtera arte. Urte berean, Eroski Taldeko presidente izendatu zuten. 1992an, Mondragon Korporazioko Banaketa eta Elikadura Dibisioko presidenteorde izan zen eta 1995ean MCC Taldeko Kontseilu Orokorreko presidente izendatu zuten.

 

Sari banaketa ekitaldia

Saria datorren azaroaren 12an banatuko da Eibarko Coliseo Antzokian egingo den ekitaldian. Cancelok saria jasoko du, Juan Luis Baroja Collet artistaren brontzezko eskultura, Sabin Osororen eskutik. Osorok iaz jaso zuen Gure Balioak Saria.

Sari banaketa ekitaldian Garbiñe Biurrun epaileak hitzaldia eskainiko du balioen inguruan.

Ekitaldia irekia izango da, dohainik.

 

Antonio Cancelo (Puebla de Sanabria, Zamora, 1936)

Zamorako herri txiki batean jaioa, ATS ikasketak egin eta horretan jardun zuen lanean denbora batez. 60. hamarkadaren hasieran gurasoekin Eibarrera etorri zen eta kezka sozial, erlijioso eta kulturalak zituen gazte talde batekin egin zuen bat. Testuinguru honetan, helburu sozialak zituzten zenbait enpresa-ekimenetan interesa agertu eta, azkenean, kontsumo kooperatiba baten sorreran parte hartuko du, Juan XXIII izenarekin, eta bertako zuzendari izango da.  Kooperatiba hau 1969an sortuko den EROSKIren jatorrizko muinaren parte izango da.

Formazio egokirik gabe enpresa munduan zuzendaritza postuetan aritzeko, aldi berean ikasten eta lanean jardungo du. Eroskiren zuzendaritza hartuko du eta 25 urtez egongo da bertan. Denbora horretan estatuan inoiz egon den kooperatiba handiena bihurtuko da eta banaketaren sektorean aritzen diren hiru enpresa garrantzitsuenetako bat izango da.     .     

Bere lan ibilbideko azken urteetan, Mondragon Taldeko presidente izango da, 6 urtez, eta urte horietan asko handituko da. 28.000 lanpostu izatetik 60.000 izatera pasako da.

Egun, enpresen aholkularia da, hitzaldiak eskaintzen ditu eta hainbat argitalpenetan artikuluak idazten ditu.