Edukira salto egin | Salto egin nabigazioara

Tresna pertsonalak

Debabarreneko Garapen Ekonomikorako Elkartea
Nabigazioa
Hemen zaude: Hasiera Albisteak Martxoaren 27tik 29ra egingo da ABIAN Debabarreneko Lanbide Heziketa Azokaren IV. edizioa

Martxoaren 27tik 29ra egingo da ABIAN Debabarreneko Lanbide Heziketa Azokaren IV. edizioa

2019/03/15
  • debabarrena
  • Lanbide Heziketa
  • ABIAN
Eibarko Armeria Eskolako patioan egingo da, Debabarreneko Udalek, Debegesa Garapen Agentziaren bitartez, eta eskualdeko Lanbide Heziketako ikastetxe guztiek antolatuta

Martxoaren 27tik 29ra bitartean egingo da Armeria Eskolako patioan, Eibarren, ABIAN Lanbide Heziketa Azokaren laugarren edizioa. Erakusketa espazio bakar batean Debabarreneko Lanbide Heziketako zortzi ikastetxeetan eskaintzen diren heziketa ziklo eta prestakuntza-ibilbide ezberdinak bildu eta erakutsiko dira. Honako ikastetxe hauek parte hartuko dute: Armeria Eskola, IMH Makina Erramintaren Institutua, Meka Lanbide Eskola, Kardala Akuakultura Eskola, Mutrikuko Institutua, Uni Eibar-Ermua,Eibarko Oinarrizko Lanbide Heziketarako Udal Institutua eta Ermua-Mallabiako Oinarrizko Lanbide Heziketarako Udal Institutua.

Debabarreneko eskualdean 2013az geroztik ospatu da, bi urtetik behin, ABIAN Debabarreneko Lanbide Heziketaren Azoka, Debabarreneko Udalek, Debegesa garapen agentziaren bitartez, eta eskualdeko Lanbide Heziketako ikastetxe guztiek elkarlanean antolatuta. Egitasmoaren helburu nagusia da kalitatezkoa den eta lan-merkatuaren beharretara egokitzen den lanbide heziketa gerturatzea eta izen ona lortzen laguntzea da.

ABIAN azokak, beste behin, Eusko Jaurlaritzako Enplegu eta Gizarte Politiketako Sailaren, Gipuzkoako Foru Aldundiko Ekonomia Sustapeneko, Landa Inguruneko eta Lurralde Orekako Sailaren eta SD Eibar Fundazioaren laguntza ekonomikoa jaso du.

Halaber, eskualdeko hamahiru enpresa industrialek ekimenarekin bat egin dute, Lanbide Heziketaren sustapenean euren konpromisoa eta lankidetza erakutsiz. Enpresa laguntzaile dira: Alcorta, Bronymec, DanobatGroup, Egile, EPC, Grupo Unceta, Haizelur, HRE Hidraulic, IK4-Tekniker, Industrias Mail, MEK Group, Sitab eta Urkotronik.

Eskualdeko enpresa-sareak Debabarreneko Lanbide Heziketarekiko erakutsitako konpromisoa eta inplikazioak aukera ematen du ikasleen prestakuntza teoriko-praktikoa hobetzeko eta lan-errealitatera egokitzeko, eta horrela, pertsonen enplegagarritasuna eta enpresen lehiakortasuna bultzatzeko. Ildo horretatik, ABIAN azokaren laugarren edizioak horixe nahi du bereziki nabamendu, Lanbide Heziketak “lan-merkatuan sartzeko aukera onenak” eskaintzen dituela.

Azokaren gaineko xehetasun guztiak gaur goizean aurkeztu dira SD Eibarrek Ipuruan dituen instalazioetan egin den prentsaurrekoan (*ikusi argazki-galeria). Bertan izan dira SD Eibar Fundazioko presidenteorde Mikel Larrañaga, Debabarreneko LHko ikastetxeetako ordezkariak eta Ermuko alkate eta Debegesako presidente Juan Carlos Abascal. Azken honek eskerrak eman dizkie, eskualdeko Udal guztien izenean, erakunde eta enpresa laguntzaileei. “Enpresek bereziki eskatzen eta baloratzen dituzte Lanbide Heziketan tituludunak eta lan-merkatuan sartzeko aukerak gero eta handiagoak dira LHko ikasleentzat” nabarmendu du.

Heziketa ziklo “maskulinizatuetan” nesken parte-hartzea sustatzearen alde ere hitz egin du, espezialitate zientifiko-teknikoetan esaterako emakumeek oso presentzia txikia dute oraindik eta, aldiz, laneratze-maila altua duten ikasketak dira.

Gainera, Juan Carlos Abascalek hezkuntza arloan lankidetza publiko-pribatuaren garrantzia ere adierazi du, eskualdearen garapen ekonomiko eta sozialaren oinarri gisa. “Azokak bete-betean egiten du bat Basque Precision Technology District (BPTD) ekimenarekin; proiektu honek gure eskualdeko sektore industriala sendotzea du helburu, besteak beste, pertsonen kualifikazioa eta espezializazioa bultzatuz, Debabarreneko eskualdea erreferente bilaka dadin doitasun-teknologien eremuan. Era berean, eskualdeko Industria Lehiakortasunerako Planaren parte da ekimen hau.

Bestalde, Meka Lanbide Eskolako Ikasketa-buru Kontxi Aranak, “Lanbide Heziketaren onurak ezagutzera emateko ABIAN bezalako topaketen garrantzia” azpimarratu du; onura horien artean dira: lan merkatura egokitutako titulazio berrien etengabeko sorrera eta eguneraketa, LH ikasteko sarbide ezberdinak eta LHko titulazio eta unibertsitate graduen arteko zubiak, Lanbide Heziketa Duala, ikasleen prestakuntza prozesuan enpresak ere gehituz, edota ekintzailetzaren sustapena Ikasenpresa bezalako programei esker. Ikasenpresa programak Lanbide Heziketako ikasleen artean ekintzailetza bultzatzea du helburu, ikasgeletan euren enpresa-proiektuak sortuz. Hain zuzen ere, Eibarren burutzen da urtero Ikasenpresa Azoka, Tknikak (LHko Ikerketa eta Berrikuntza Aplikatuko Zentroa, Eusko Jaurlaritzako Hezkuntza Sailak bultzatua) Eibarko Udalarekin batera antolatuta.

700 ikasle baino gehiago

Martxoaren 27tik 29ra, ABIAN azokara hurbiltzen direnek eskualdeko prestakuntza-eskaintza zabala eta eskura dauden titulazio ezberdinak bertatik bertara ikusteko eta ezagutzeko aukera izango dute. Lanbide Heziketako ikastetxe bakoitzak bere stand propioa izango du; eskaintzen diren espezialitate eta familia profesional ezberdinak zuzenean erakutsiko dituzte.

Egun, Debabarrenean 45 bat heziketa ziklo eskaintzen dira, arlo profesional ezberdinetara egokitutako eduki teorikoekin eta praktikoekin, horien artean LH Duala, enplegagarritasun handikoa eta enpresek oso estimatua.

ABIAN azokak iraungo duen hiru egunetan, eskualdeko DBHko eta Batxilergoko ikasleen bisitak izango dira; 700 ikasletik gora igaroko dira bertatik, etorkizun hurbilean zer ikasketa egin erabakitzeko informazio osoa izan dezaten.

Ikasleez gainera, publiko orokorrak ere zabalik izango ditu azokako ateak (gurasoak, orientatzaileak, langabezia egoeran dauden pertsonak...). Hitzaldiak eta tailerrak ere antolatuko dira, irekiak eta doakoak, interesa duten herritar guztiei zuzenduta.

Hitzaldiak eta doako tailerrak

ABIAN azoka bisitatu nahi duten guztientzat sarrera irekia eta doakoa izango da. Ordutegiari dagokionean, 10:00etatik 14:30era zabalduko da, eta ostegunean arratsaldez ere irekita egongo da, 16:00etatik 18:30era. Erakusketa guneaz gainera, ABIAN azokak hitzaldiak eta doako tailerrak eskainiko ditu.

Asteazkenean, hilak 27, 11:00etan, irekiera ekitaldia egingo da. Besteak beste, bertan izango da Eusko Jaurlaritzako Enplegu eta Gazteria sailburuordea, Marcos Muro.

Hitzaldien ostean, Debegesa garapen agentziak STEM arloko gaien eta lanbideen inguruko Debabarreneko gazteen pertzepzioaren gaineko ikerketaren emaitzak eta ondorioak aurkeztuko ditu. Debabarreneko 14-15 urteko 548 ikaslek parte hartu dute galdetegian. STEM (Zientzia, Teknologia, Ingeniaritza eta Matematikak) bokazioen inguruko ikerketa Elhuyarrekin lankidetzan burutu da, analisian genero ikuspegia txertatuz.

Bigarren egunean, ostegunez, hilak 28, azokak ondorengo saio hauek eskainiko ditu:

  • 11:00etan, enplegura bideratutako Profesionaltasun Ziurtagirien gaineko jardunaldia egingo da, Meka Lanbide Eskolak eskainia.
  • Ordu berean, 11:00etan, Debegesak Hazilan laneratze programaren seigarren edizioa aurkezteko informazio-saioa eskainiko du. Maiatzean abiatuko da. Egitasmo hau goi mailako ikasketak dituzten eta lana aurkitu ezinik dabiltzan 20-44 urte bitarteko pertsonei dago zuzenduta.
  • 12:00etan eta 16:00etan, “Enplegua bilatzeko bide berriak” tailerra eskainiko da.

Hirugarren eta azken egunean, ostirala, hilak 29, 10:00etan, ikastetxeetako orientatzaileei zuzendutako saioa antolatuko da, Debabarreneko Lanbide Heziketa ezagutu dezaten. Jarraian, 11:00etan, Debegesak ekintzailetza sustatzeko eta ekintzaileei laguntzeko tailerra emango du “Nola sortu zure negozio-ideia propioa?” izenburupean.

Saio eta tailer hauek guztiak irekiak eta doakoak dira. Informazio gehiago: www.debegesa.eus.

 

Martxoaren 27tik 29ra egingo da ABIAN Debabarreneko Lanbide Heziketa Azokaren IV. edizioa