Edukira salto egin | Salto egin nabigazioara

Tresna pertsonalak

Debabarreneko Garapen Ekonomikorako Elkartea
Nabigazioa
Hemen zaude: Hasiera Albisteak Gazte Robotika egitasmoak robotika eta bideojokoen sorkuntza tailerrak eskainiko ditu udan Debabarrenean

Gazte Robotika egitasmoak robotika eta bideojokoen sorkuntza tailerrak eskainiko ditu udan Debabarrenean

2018/05/18
Zortzi tailer eskainiko dira Debabarreneko herri ezberdinetan; egitasmoaren helburua da haur eta gazteen artean zientzia, teknologia, ingeniaritza, artea eta matematikarekiko interesa piztea. Neskatilen parte-hartzea sustatu nahi da bereziki. Aurretiko izen-ematea zabalik da www.gazterobotika.eus webgunean.

Joan den urteko udan eta Aste Santuan izandako harrera bikainaren ostean, Gazte Robotika egitasmoak aurtengo udan ere robotika eta bideojokoen sorkuntza tailerrak eskainiko ditu Debabarreneko sei udalerritan, Deban, Eibarren, Ermuan, Mallabian, Mutrikun eta Soraluzen. 2017an Debabarreneko Udalek eta Debegesa Garapen Agentziak abian jarri zutenetik, 200 gaztetxo baino gehiagok parte hartu dute egitasmoan.

Edizio berri honetan zortzi tailer eskainiko dira, 2001 eta 2009 urteen artean jaiotako haur eta gazteei zuzenduta. Talde lana sustatuz, gaztetxoek teknologiarekin ikasi eta ondo pasatzeko aukera izango dute euren robot eta biodejoko propioak sortuz eta programatuz. Gainera, tailer hauetan euren proiektuak diseinatu eta garatu ostean, irailaren 22an Ermuko Izarra Centren egingo den Euskadiko Hezkuntza Robotika Txapelketaren 2. edizioan parte hartzeko aukera izango dute, doan.

Berritasunen artean, joko edota erronka berriak diseinatu dira gaztetxoek euren proiektuetan aplika ditzaten; horrenbestez, joan den urteko edizioan izena eman zutenek aurten ere parte hartu ahal izango dute, eta ikasten jarraitu, sormena landuz eta konponbide teknologiko berritzaileak garatuz.

Iraupenari dagokionean, 20 orduko tailerrak dira. Euskaraz egingo dira eta Doplay enpresak emango ditu. Hona hemen tailer teknologikoen datak:

  • DEBA: uztailaren 2tik 6ra.
  • EIBAR: ekainaren 26tik 29ra.
  • ERMUA: abuztuaren 27tik 31ra eta irailaren 3tik 6ra.
  • MALLABIA: irailaren 3tik 7ra.
  • MUTRIKU: abuztuaren 27tik 31ra.
  • SORALUZE: ekainaren 25etik 29ra eta uztailaren 2tik 6ra.

 

Tailerretan parte hartzeko 30 euro ordaindu beharko da; Udal parte-hartzaileek diruz lagundutako tailerrak dira. Plaza mugatuak dira. Aurretiko izen-ematea zabalik da gazterobotika.eus webgunean.

 

STEAM gaitasunak sustatzea

Azken urteotan gora egin du gure eskualdean bokazio teknikoen sustapenaren aldeko apustuak. Horren erakusgarri da Gazte Robotika egitasmoa, duela urtebete Debabarreneko Udalek eta Debegesa Garapen Agentziak abian jarritakoa. Egitasmo honen helburu nagusia da bokazio teknikoak sustatzea, eskualdeko enpresa industrialek izan ditzaketen beharrei (talentua) erantzuna emateko helburuarekin. 

Ekimen hezigarri bat da, haur eta gaztetxoen artean zientzia, teknologia, ingeniaritza eta matematikarekiko interesa pizteko asmoa duena (STEM deritzoten gaitasunak), modu praktiko eta dibertigarri batean.

Gainera, Gazte Robotikak ahalegin berezia egiten du tailer teknologikoetan bereziki neskatilen parte-hartzea bultzatzeko. Izan ere, ikasketa teknikoetan matrikulatzen diren ikasleen artean, neskak askoz gutxiago dira; ziklo industrialen bat ikasten duten nesken portzentajea ez da %6ra ere iristen. Azpimarratzekoa da, joan den urteko edizioan neskak %30 izan zirela.

Helburu zehatzagoen artean daude, gaztetxoen artean talde-lana sustatzea, ikastetxe, enpresa eta robotikaren eta programazioaren arloan diharduten entitateen arteko topagunea sortzea, eta Debabarrena arlo horien aldeko apustua egiten duten eskualdeen artean posizionatzea.

 

Euskadiko II. Hezkuntza Robotika Txapelketa, Ermuan

Ermuak amaiera bikaina emango dio Gazte Robotika egitasmoari, Euskadiko Hezkuntza Robotika Txapelketaren bigarren edizioarekin. Irailaren 22an izango da, Izarra Centren.

Robotikaren eta teknologia berrien inguruko topaketa izan nahi du txapelketak, doakoa eta Euskadi osoko gazteei zuzendua; eskola adineko haur eta gazteak (8 eta 16 urte bitarte) motibatzea du helburu, robotika eta programazio arloan lehen urratsak eman eta euren gaitasunak landu ditzaten, talde-lana eta arazoen ebazpena lantzearekin batera.

Gazte Robotika egitasmoak robotika eta bideojokoen sorkuntza tailerrak eskainiko ditu udan Debabarrenean