Edukira salto egin | Salto egin nabigazioara

Tresna pertsonalak

Debabarreneko Garapen Ekonomikorako Elkartea
Nabigazioa
Hemen zaude: Hasiera Albisteak Euskal Kostaldeko Geoparkeak haurrentzako tailerrak antolatu ditu Ingurumenaren Nazioarteko Egunaren baitan

Euskal Kostaldeko Geoparkeak haurrentzako tailerrak antolatu ditu Ingurumenaren Nazioarteko Egunaren baitan

2011/06/01
Datorren igandean, ekainak 5, Munduko Ingurumenaren Eguna ospatuko da mundu osoan, eta Euskal Kostaldeko Geoparkeak haurrei zuzendutako tailerrak antolatuko ditu iganderako Deban, Mutrikun eta Zumaian.

 

Datorren ekainaren 5ean Ingurumenaren Munduko Eguna ospatuko da mundu osoan eta egun honetarako Euskal Kostaldeko Geoparkeak haurrentzako tailerrak antolatu ditu Deba, Mutriku eta Zumaian.

Tailer eta ekimen hauen bitartez, Deba, Mutriku eta Zumaiako gaztetxoei euren herrietako eta inguruetako ondare geologikoa gerturatu nahi zaie. Jolasaren bidez, tailer hauetan, besteak beste, norberak bere fosila egin ahal izango du eta Geoparkeko natura eta ondare geologikoaren inguruko hainbat bitxikeria ezagutu ahal izango ditu. Parte-hartzaile guztiek opari bat jasoko dute, gainera.

Jarraian herri bakoitzean antolatu diren ekimenak zehazten dira:

DEBA

11:30–13:30. Debako harrien eta fosilen tailerra: geo-detektibe txikiak. Foruen Plazan.

MUTRIKU

12:00-14:00: Haurrentzako tailer geologikoa, Beheko Plazan.

ZUMAIA

10:00-12:00: Doako barne bisita eta oinezko irteera geologikoa Algorri Interpretazio Zentroan.

10:00-13:30: Algorriko Jolasa eta fosilen detektibeen tailerra (8-12 urte).

Hain zuzen, Zumaiako ekimen hauek udalak antolaturiko Aste Berdearen programaren baitan egingo dira.


Asteburuko eskaintza turistikoa

Euskal Kostaldeko Geoparkeak astebururako eskaintza plazaratu du www.geoparkea.com web gunean. Bertan erreserbak egiteko aukera dute bisitariek.

 

Larunbaterako, ekainak 4, hiru proposamen eskaintzen dituzte:

  • Irteera geologikoa eta txalupaz irteera. Zumaiako Algorri Ezagutza Etxean goizeko 10:00etan egin da hitzordua. Geologo baten laguntzarekin, zonaldeko ondare geologikoa nahiz bertako itsaslabarrak ezagutzeko aukera izango dute bisitariek. 3 ordu eta erdiko iraupena duen jarduerari amaiera emateko, txalupaz egingo dute ibilaldia flysch-a itsasotik bistaratzeko.
  • Mutrikuko Hirigune Historikoan zehar ibilaldia. Goizeko 11:00etan, bisita kulturala antolatu da Mutrikun. Bisitariek Mutrikuko hirigune historikoan zehar, erdi-aroko kale estu eta harriztatuen artean dauden monumentu nagusiak bisitatuko dituzte.
  • Flyscharen ibilbide osoa: Arratsaldez, Flyscharen ibilbide osoa egiteko aukera egongo da. Irteera Mutrikuko Nautilus ikasgune geologikoan hasi eta Zumaiaraino itsasoz egingo da ibilbidea. Bisita 16:00etan hasiko da Mutrikun eta hiru ordu eta erdiko iraupena du.

 

Igandean, ekainak 5, Ibilaldia txalupaz egingo da. Itsas txango honetan Deba eta Zumaia arteko Flyscha itsasoz ezagutzeko aukera izango da. Goizeko 11:30etan elkartuko dira bisitariak Zumaiako kaian. Jarduerak 75 minutuko iraupena du.

Ibilbide hauen guztien gaineko informazio osoa eta erreserbak: www.geoparkea.com webgunean.  

 

Euskal Kostaldeko Geoparkeko I. Argazki Lehiaketa

Gogoratu, datorren ekainaren 15ean bukatuko dela epea Euskal Kostaldeko Geoparkeak antolatu duen I. Argazki Lehiaketara lanak aurkezteko epea.

Lehiaketan bi kategoria  desberdintzen dira: Geoparkeko Geologia batetik, eta Geoparkeko paisaia eta ondare kultura bestetik. Lehenengo kategoria EAEko Bigarren Hezkuntza eta Batxilergo Ikastetxeetako ikasleei zuzenduta dago eta bigarren kategorian, berriz, edonork parte har dezake.

Oinarrien, sarien eta epeen inguruko informazio guztia www.geoparkea.com webgunean ikus daiteke.