Edukira salto egin | Salto egin nabigazioara

Tresna pertsonalak

Debabarreneko Garapen Ekonomikorako Elkartea
Nabigazioa
Hemen zaude: Hasiera Albisteak Dolmenen Ibilbidea ezagutzeko aukera, igandean

Dolmenen Ibilbidea ezagutzeko aukera, igandean

2017/09/04
  • Dolmenen Ibilbidea
  • Soraluze
Dolmenen Ibilbidea ezagutzera emateko bisita gidatua eskainiko da igandean, irailak 10. Euskaraz izango da eta doan. Beharrezkoa da aurrez izena ematea.

Dolmenen Ibilbidearen balio arkeologikoa eta geologikoa zein paisaia-balioa ezagutzera emateko doako bisita gidatua egingo da igandean, irailak 10. Goizeko 10:00etan hasiko da, Karakateko aparkalekutik abiatuta. Bisita gidatua euskaraz izango da.

Elgoibar, Soraluze eta Bergarako udalerriak lotzen ditu Dolmenen Ibilbideak eta balio arkeologiko handia du; bertan Neolitoko eta Brontze Aroko tumuluak eta trikuharriak aurkitzen dira. Antzinako giza taldeek horrelako mendilerroak, paisaiaren mugarri nagusi zirenak, aukeratu zituzten hildakoak ehorzteko eta beren lurraldea seinalatzeko. Monumentu megalitikoen bidez utzi diguten ondarea antzinako ehorzte-errituekin lotuta dago.

9 kilometroko ibilbidea egingo dute, Karakate eta Irukurutzeta artean. Ibilaldian parte hartuko dutenei gomendatzen zaie arropa erosoa eta mendiko oinetakoak eramatea. Ibilbidearen amaieran parte-hartzaileek gazta, ogia eta sagardoa dastatzeko aukera izango dute.

Parte hartzeko interesa dutenek aurrez eman behar dute izena 657 79 46 77 telefonora deituz edo info@begi-bistan.com helbidera idatziz.

 

Ehundik gora lagunek parte hartu dute orain artean

Joan den ekainean jarri zituzten abian Elgoibarko, Soraluzeko eta Bergarako Udalek, Debegesa garapen agentziarekin batera, Dolmenen Ibilbidea ezagutarazteko bisita gidatuak. Hasieratik helburutzat finkatu zen Ibilbidea ezagutzera ematea eta bertan dauden trikuharri eta tumuluak balioan jartzea. Dagoeneko sei irteera egin dira eta guztira 111 lagunek parte hartu dute.

Igande honetakoaz gainera, beste bi bisita gidatu egingo dira aurten: irailaren 24an (gaztelaniaz), eta urriaren 8an (euskaraz).

Dolmenen Ibilbidea ezagutzeko aukera, igandean

Dolmenen Ibilbidea ezagutzeko bisita gidatuak